VANPERSIE NA DEPAY WATEMWA TEAM YA TAIFA

Memphis Depay na Robin Van Persie wametemwa katika kikosi cha timu ya taifa ya Uholanzi cha hivi karibuni kwa kila mmoja kuwa na sababu zake zilizotajwa na kocha Danny Blind, baba wa mchezaji wa Manchester United, Delay Blind.

Kocha huyo amebainisha kuwa Memphis Depay (21) anahitaji kucheza kwa ajili ya timu zaidi ili apate nafasi katika kikosi hicho kwa maana sasa anaonekana hayupo tayari.

Aidha kuhusu mshambuliaji Robin Van Persie kocha huyo amesema, bado fomu na fitness ya Van Persie haiko sawa wakati huu na kwamba anahitaji kuangalia chipukizi katika nafasi hiyo ya ushambuliaji.

Uholanzi ilishindwa kufuzu kucheza fainali za mataifa ya Ulaya EURO 2016 nchini Ufaransa huku wachezaji Robin Van Persie na Memphis Depay wakigombana wakiwa mazoezini kuelekea michezo hiyo ya kufuzu.

Depay aliyetarajiwa kuwa nyota mpya ya Uholanzi na hata kusajiliwa kwa dau la pauni milioni 25 kutoka PSV Eindhoven kuelekea Manchester United, amekua akifanya vibaya hadi kupelekea kuwekwa nje na kocha wake Louis Van Gaal wa Manchester United.

MOURIHNO KUIKOSA STOKE CITY

Majanga yanazidi kumuandama kocha mreno wa Chelsea, Jose Mourinho baada ya kukumbwa na adhabu ya kutakiwa kutokaa katika benchi la ufundi katika mechi moja na kisha kutakiwa kulipa faini ya £40,000 za kimarekani kwa kauli mbovu alizozitoa dhidi ya mwamuzi aliyechezesha mechi kati ya Chelsea na Westham weekend iliyopita.

Aidha kocha msaidizi wa Chelsea ambaye naye alitolewa nje kwa kadi nyekundu hakupewa adhabu bali ameandikiwa barua ya onyo inayomkumbusha majukumu yake kama msaidizi.

Adhabu hiyo ya Mourinho ni tofauti na ile ambayo alipewa alipotoa maneno yasiyo ya busara baada ya kufungwa magoli 3-1 dhidi ya Southampton majuma kadhaa yaliyopita na kwamba ataitumikia muda wowote.

Chelsea itasafiri hadi Britannia Stadium kucheza na Stoke City weekend ijayo na kwamba Mourinho atatakiwa kutekeleza adhabu hiyo mara moja, vinginevyo akate rufaa.

Sanjari na vitendo hivyo vya kinidhamu dhidi ya FA, Mourinho pia amekua akilaumiwa kwa jinsi alivyomtendea isivyostahili aliyekua daktari wa timu hiyo mwanadada Eva Carneiro na kusababisha aondoke klabuni hapo, huku sasa akiwa amefungua kesi mahakamani kutaka fidia zake.