EXCLUSIVE: CAF YAFAFANUA SUALA LA KESSY, YASEMA ANAWEZA KUCHEZA HATA BILA YA BARUA KUTOKA SIMBA

Shirikisho la Soka la Afrika (Caf) limetoa ufafanuzi kuhusiana na beki wa Yanga, Hassan Kessy kuhusu mechi ya kesho ya Kombe la Shirikisho kati ya Yanga dhidi ya Mo Bejaia ya Algeria.

Awali, shirikisho hilo, lilieleza kuhusiana na suala la Kessy kulazimika kuwa na barua ya ruhusa kutoka Simba kwa kuwa ni klabu aliyotoka.

Lakini Msemaji wa Caf, Junior Binyam amesema kinachotakiwa kufuatwa katika hili ni Yanga kuangalia kama wamekamilisha taratibu za usajili za michuano ya Kombe la Shirikisho.

“Suala la kama hakuna malalamiko katika klabu anayotokea ni muhimu sana, baada ya hapo ni kuangalia kama usajili wa michuano hiyo umefuatwa. Kuna aina mbili, kwenye mtandao na kawaida.

“Kama Caf imetoa leseni, kunakuwa hakuna shida. Lakini kunaweza kuwa na angalizo la kuangalia kama mchezaji hana mkataba tena na klabu aliyotokea au walimalizana kwa kufuata taratibu zote.

“Kama atakuwa amemaliza mkataba na klabu aliyotokea, hakika hakuna tatizo hata kidogo na linaloangaliwa hapo ni hivi; usajili wa Caf umekamilika? Leseni imetoka? Kama hayo yametekelezwa, hakuna tatizo,” alisema.

Alipotafutwa mara ya pili kuhusiana na suala la Kessy, Binyam alisema: “Nimeambiwa Yanga wamezungumza na wenzetu wakati wa pre-match meeting kule Algeria, wameuliza maswali yote na kujibiwa vizuri na wameelewa.

“Ninaamini wachezaji wao watakuwa hawana tatizo kwa maana ya usajili wa Caf. Kwenye suala la usajili katika klabu walizotoka, hili tunaweza kusubiri chama cha nchi yenu (TFF) ndiyo waseme. Lakini hadi sasa, inaonekana wachezaji hao wanaweza kutumika, hilo tuwaachie wao (Yanga).”

Kwa kauli hiyo inaonekana Yanga, wana kila sababu ya kuwatumia Kessy, Juma Mahadhi, Adnrew Vicent ‘Dante’ na Beno Kakolanya ambao wamesajiliwa. Lakini Obey Chirwa raia wa Zambia atalazimika kusubiri wakati Yanga ikipambana kumtafutia usajili wake wa leseni kutoka Caf.

HIZI NI SEHEMU YA SHERIA ZA USAJILI WA MICHUANO YA KOMBE LA SHIRIKISHO NA KLABU INATAKIWA KUFANYA NINI KUKAMILISHA USAJILI WA MCHEZAJI AMBAZO UFAFANUZI WA BINYAM UNAPITIA HUMU.

KWELI KAGAME ANA DAMU YA SOKA, MWANAYE SASA ACHAGULIWA TIMU YA TAIFA YA RWANDA

Unaweza kusema kweli damu ya soka imo kwenye familia ya Rais Paul Kagame wa Rwanda.

Yeye ndiye shabiki mamba moja wa APR ya Rwanda, lakini ni shabiki namba moja wa timu ya taifa ya Rwanda maarufu kama Amavubi, yaani manyigu.

Lakini kama hiyo haitoshi, mwanaye Ian Kagame ameonyesha uwezo hadi kuchaguliwa katika kikosi cha timu ya taifa ya vijana chino ya miaka 20.

Ian unamuona akiwa katika kikosi hicho cha U20 cha Rwanda ambacho kilicheza dhidi ya Morocco kwenye Uwanja wa Amahoro mini Kigali, hive karibuni.

Pia usisahau, Kagame ni shabiki mkubwa wa kikosi cha Arsenal kutoka England na ana urafiki na Kocha Arsene Wenger.

BREAKING NEWS: CAF YAMZUIA KESSY KUIVAA MO BEJAIA KESHO HADI SIMBA ITOE RUHUSA

SHIRIKISHO LA SOKA AFRIKA (CAF) LIMESEMA BEKI HASSAN KESSY HAWEZI KUCHEZA KATIKA MECHI DHIDI YA MO BEJAIA HADI KLABU YA SIMBA ITAKAPOTOA BARUA YA RUHUSA KWAMBA ILIMALIZANA NAYE NA IMERIDHIA KUJIUNGA KWAKE NA YANGA.
TAYARI KESSY NA KIKOSI CHA YANGA WAKO BEJAIA NCHINI ALGERIA KWA AJILI YA MECHI HIYO YA KOMBE LA SHIRIKISHO AFRIKA, KESHO.

WAKATI YANGA INAWAVAA WAARABU KESHO, DANTE APANIA KUFANYA YAKE

Kuna uwezekano mkubwa beki mpya wa Yanga, Andrew Vincent ‘Dante’ akachezeshwa kesho Jumapili dhidi ya MO Bejaia ya Algeria, mwenyewe amesema akipata nafasi hiyo hatatoka kikosi cha kwanza.

Yanga kesho Jumapili inatarajiwa kucheza na MO Bejaia mechi ya Kundi A ya Kombe la Shirikisho Afrika kwenye Uwanja wa l’Unite Maghrebine uliopo Bejaia, Algeria.

Dante aliyesajiliwa na Yanga siku chache zilizopita kutoka Mtibwa Sugar, ana nafasi kubwa ya kucheza katika beki ya kati na Kelvin Yondani kwani Nadir Haroub ‘Cannavaro’ hayupo kikosini.

Cannavaro anatumikia adhabu ya kadi nyekundu aliyoipata dhidi ya Sagrada Esperanca na Vincent Bossou ambaye hucheza nafasi hiyo, naye hakufanya mazoezi kikamilifu na wenzake kutokana na kuchelewa kujiunga nao.

Akizungumza kutoka Algeria, Dante alisema: “Kwa jinsi nilivyo fiti kutokana na mazoezi niliyofanya kambini Uturuki, naamini nikipata nafasi kikosi cha kwanza sitatoka.”

“Nitacheza kwa juhudi kubwa kumvutia kocha ili awe ananipa nafasi kila mara kikosini, labda nisipangwe lakini nikicheza tu nitahakikisha sikai benchi.”

Dante anayemudu kucheza nafasi zote za ulinzi na kiungo mkabaji, alisema kambi ya muda iliyoweka Yanga nchini Uturuki tangu Jumapili iliyopita hadi jana Ijumaa, imewasaidia kwa kiasi kikubwa.

Mbali ya Dante, hadi sasa Yanga imewasajili Hassan Kessy kutoka Simba, Juma Mahadhi (Coastal Union) na Beno Kakolanya kutoka Prisons.

SOURCE: CHAMPIONI

KOCHA MGHANA NDIYE ATAAMUA MAYANJA ANABAKI AU AENDE ZAKE

TETTEH

Kwa kiasi kikubwa Simba imeshamalizana na Kocha Mghana, Sellas Tetteh Teivi ili aje kukinoa kikosi hicho msimu ujao katika safari ya kuwania ubingwa wa Ligi Kuu Bara. 

Sasa kali zaidi ni kwamba, kocha huyo ndiye atakayetoa ruhusa ya kaimu kocha mkuu wa timu hiyo, Jackson Mayanja kwamba aendelee na kazi au apigwe chini. 

Teivi amewahi kukinoa kikosi cha timu ya vijana ya Ghana na sasa akiwa na Sierra Leone amekabidhiwa hatma ya Mayanja ambaye mkataba wake wa awali unamtambulisha kama kocha msaidizi.

MAYANJA NA KIKOSI CHA SIMBA

Taarifa kutoka ndani ya Simba zinasema, uongozi unasubiri ujio wa kocha mpya ili atoe pendekezo lake kama ataendelea na Mayanja au atakuja na msaidizi wake kwani kila mwalimu ana falsafa zake.

Habari zinasema, sekretarieti ya Simba imeliacha suala la Mayanja kwa Teivi ila wao sasa wanaendelea na mchakato wa kumpata kocha mpya wa makipa.

“Suala la kocha msaidizi tumeliacha kwanza, unajua makocha wengi wanapenda kuja na wasaidizi wao, iwapo huyu atakuja mwenyewe, basi atafanya kazi na Mayanja lakini kama atakuja na mwenzake, haina jinsi pia tunamsikiliza.

“Lakini sisi kama kamati (ya utendaji) kila mmoja anataka Mayanja tuendelee naye kutokana na kazi kubwa aliyoifanya msimu uliopita,” kilisema chanzo hicho.

Akiwa kaimu kocha mkuu akichukua mikoba ya Muingereza Dylan Kerr, Mayanja aliiongoza Simba katika mechi 16 za ligi kuu na kushinda 11, sare moja huku akifungwa michezo minne dhidi ya Yanga, Toto African, Mwadui FC na JKT Ruvu.

Hakuna kiongozi wa Simba ambaye alikuwa tayari kulitolea ufafanuzi suala hilo na hata ofisa habari wa timu hiyo, Hajji Manara alipotafutwa alisema: “Nipo likizo hivyo sijui kinachoendelea klabuni.”

BEKI AIDENGULIA SIMBA, ALIPORUDI AKAKUTA TAYARI NAFASI YAKE INA MTU MWINGINE

Mabosi wa Simba kiroho safi walikubaliana kumsajili beki wa kati wa Prisons, Nurdin Chona, lakini beki huyo akataka asajiliwe kwa dau la Sh milioni 40, Simba ikanywea, ikatulia.

Kwa kuwa Simba wana shida, wakambembeleza Chona awashushie bei, lakini beki huyo akaendelea kubaki palepale kwamba anataka Sh milioni 40. Simba ikaona isiwe shida ikaachana naye.

Hesabu za Simba zilikuwa ni kumsajili Chona ili kuimarisha safu yake ya beki ya kati ili aweze kushirikiana na Novatus Lufunga na Juuko Murshid. 

Baada ya kuona mambo yanashindikana, Simba ikazungumza na beki wa Mwadui FC, Emmanuel Semwanza ambaye alikubali kusaini kwa Sh milioni 20 tu kwa mkataba wa miaka miwili. Mambo yakaishia hapo.

Hebu sikia kilichotokea baada ya Semwanza kusajiliwa, mmoja wa mabosi wa Simba alisema: “Aliposikia tumemsajili Semwanza, eti Chona akatuomba tumsajili hata kwa Sh milioni 20.

“Tukamjibu palepale kwamba, basi haitawezekana maana tumeshampata mbadala wake na mambo yakaishia hapo, kilichomponza ni tamaa tu,” alisema bosi huyo.

Licha ya Chona, Simba bado inahusishwa na taarifa za kumnyakua Salum Kimenya wa Prisons.

Alipotafutwa Chona alisema: “Ni kweli Simba tuliongea lakini hatukifikia mwisho, tulipishana kwenye kipengele cha maslahi lakini pia ishu ya mkataba wangu na Prisons ilichangia. Nina mkataba mrefu wa miaka minne, hivyo kwa kiasi kikubwa nao ulichangia tusifikie mwisho wa mazungumzo yetu.”

MABAO BOMBA NA MUHIMU EURO 2016, MENGI YAMEFUNGWA KUANZIA DAKIKA YA 80

Mabao mengi mazuri na muhimu katika michuano ya Euro 2016 ambayo ndiyo ipo katika hatua ya makundi, yalifungwa katika dakika za mwishoni kabisa.

Takwimu zinaonyesha mabao hayo, mengi yalifungwa katika dakika kuanzia 80 na yalikuwa muhimu kwa timu husika kuamsha uhai wa kuendelea na mashindano au kufuzu kucheza hatua ya 16 Bora. Angalia mwenyewe...

Dk 80 – Glushakov, aliifungia Russia vs Slovakia

Dk 81 – Robson-Kanu aliifungia  Wales vs Slovakia

Dk 87 – Stieber , aliifungia Hungary vs Austria

Dk 87 – Pique, aliifungia Spain vs Czech Republic

Dk 88 – Eder, aliifungia Italy vs Sweden

Dk 89 – Payet, aliifungia France vs Romania

Dk 90 – Griezmann, aliifungia France vs Albania

Dk 90+1 – Sturridge, aliifungia England vs Wales

Dk 90+2 – Berezutski, aliifungia Russia vs England

Dk 90+2 – Schweinsteiger, aliifungia Germany vs Ukraine

Dk 90+2 – Pelle, aliifungia Italy vs Belgium

Dk 90+6 – Payet, aliifungia France vs Albania

Dk 90+6 – McGinn, aliifungia Northern Ireland vs Ukraine

KAMA UNASEMA CHIRWA NI KIBOKO CHA NGOMA, BASI UMEFULIA, MAANA YEYE NDIYE ALIYEMCHAGUA ATUE JANGWANI

CHIRWA NA NGOMA WAKISHEREKEA BAO WAKATI WAKIWA FC PLATINUMS YA ZIMBABWE

Kiroho safi straika Donald Ngoma ameelezwa kupendekeza usajili wa straika Obrey Chirwa katika klabu yake ya Yanga akimtosa Walter Musona aliyekuwa chaguo lingine la timu hiyo.

Yanga ilikuwa na mpango wa kusajili straika mwingine wa kigeni baada ya kutoridhishwa na uwezo wa Issouf Boubacar raia wa Niger, hivyo ikawa na chaguo la kwanza Danny Phiri ‘Deco’ wa Chicken Inn ya Zimbabwe.

CHIRWA WAKATI AKITUA DAR, JANA.

Chaguo la pili la Yanga lilikuwa Chirwa wa FC Platinum pia ya Zimbabwe na la tatu lilikuwa ni Walter Musona pia wa Platinum.

Bosi mmoja wa Yanga anayeshughulikia mambo ya usajili aliliambia Championi Jumamosi kuwa, baada ya kushindwa kumsajili Deco, Ngoma aliwashauri kuhakikisha anasajiliwa Chirwa badala ya Musona.

“Ni jambo la ajabu kabisa kwani Ngoma alitueleza kuwa ni bora tumsajili Chirwa ambaye ni raia wa Zambia kuliko Musona ambaye ni Mzimbabwe mwenzake.

“Tulishangaa kwani tulidhani labda angempendekeza raia mwenzake wa Zimbabwe, (Ngoma) alitueleza Chirwa ni mzuri zaidi ya Musona, na sisi tukafuata ushauri wake,” alisema bosi huyo.

Chirwa aliwasili nchini jana jioni na alikuwa na mazungumzo ya mwisho na uongozi wa Yanga jioni hiyo kabla ya kusajiliwa halafu leo ataenda Algeria kujiunga na kikosi cha timu hiyo ambacho kesho kinacheza na MO Bejaia katika Kombe la Shirikisho Afrika.

NDANDA FC KUIMARISHA KIKOSI CHAKE KWA KUTUPIA VIFAA VIPYA SABA

Ili kuhakikisha inafanya vizuri msimu ujao wa Ligi Kuu Bara, Ndanda FC imepanga kusajili wachezaji saba kutokana na ripoti ya kocha wao, Malale Hamsini kutaka wafanye hivyo.

 Katibu Mkuu wa Ndanda, Selemani Kachele alisema, wamepanga kuongeza wachezaji saba ili kuimarisha kikosi chao kiweze kupambana ipasavyo.

“Kati ya hao wachezaji saba, mabeki wawili, viungo watatu, straika mmoja na kipa mmoja, tukifanya hivyo tutakuwa fiti zaidi,” alisema Kachele.

Ndanda haikuwa na msimu mzuri sana katika msimu uliopita, na ililazimika kufanya kazi ya ziada ili kubaki Ligi Kuu Bara.

MECHI YA YANGA KESHO HAITAKUWA LAINI, MO BEIJAIA HAIWEZI KUWA TIMU YA KUDHARAU HATA KIDOGO

Na Saleh Ally

UWANJA unaotumiwa na Mouloudia Olympique de Bejaia au Mo Bejaia unajulikana kwa jina la Unite Maghrebine, uko katika Mji wa Bejaia.

Kutoka mji mkuu wa Algeria uliotwao Algiers hadi Bejaia ni umbali wa Kilomita 228, umbali wa saa 3:30 kwa gari kwa mwendo chini ya sheria za nchi ya Algeria.

Usiku wa kuamkia keshokutwa, Yanga watakuwa uwanjani tayari kuwavaa wenyeji wao Bejaia katika mechi yao ya kwanza ya kihistoria ambayo kamwe haiwezi kuwa rahisi kama ambavyo mashabiki wanaifikiria.

Tunaiita mechi ya Kihistoria kwa kuwa gumzo lilikuwa ni Yanga kufuzu katika michuano hiyo lakini sasa ni kuanza kushiriki rasmi na kucheza kwa mara ya kwanza.

Kinachotakiwa kikubwa ni Yanga kuanza kucheza michuano hiyo na kufanya vizuri. Mechi ya kwanza inaweza kuwa dira nzuri ya mwendo wa Yanga kwa ajili ya kujenga hali ya kujiamini katika mechi nyingi zinazofuatia.

Ukiangalia kishabiki, unaweza kuona Yanga wana kazi rahisi sana kwa kuwa Bejaia ambayo imeanzishwa mwaka 1954 ni changa hata kwao ambao walianzisha klabu yao mwaka 1935. Lakini ukweli unaonyesha hivi, Bejaia wana kiu kali ya maendeleo na litakuwa kosa kubwa kuanza kuwachukulia kwa udogo au wenye kasi ndogo kama Bajaj unapolinganisha na gari lenye mwendo kasi kama Range Rover Vogue.

Kubali kwamba, Mo Bejaia wanataka kufanya vema zaidi na lazima watataka kuimaliza Yanga hasa nyumbani. Ndiyo maana licha ya kuwepo kwa timu kubwa na maarufu za Algeria kama USM Alger, JS Kabylie na ES Setif lakini wao wanaendelea kuwa wawakilishi wa nchini hiyo katika michuano ya Kombe la Shirikisho.

Kitakwimu inaonekana Bejaia ni timu yenye mwendo wa saizi ya kati lakini makini kwenye ulinzi na haifungi mabao mengi sana lakini wastani wake wa ushindi uko juu.

Katika michuano ya kimataifa, hili Yanga wanapaswa kulitazama zaidi. Inaonekana haijapoteza mechi nyumbani na ilifanikiwa kupata ushindi zaidi ya mara mbili ambao unakwenda kuanzia mabao mawili hadi matatu, ikiwa nyumbani imekuwa ikiruhusu mabao machache sana.

Kibaya zaidi, inaonekana ni timu ngumu kuruhusu mabao ikiwa nyumbani, jambo ambalo Yanga watatakiwa kulifanyia kazi sana.

Takwimu zinaonyesha timu hiyo, ilikwenda vizuri kwenye Ligi Kuu ya Algeria ingawa ikakwama katika nafasi ya sita. Lakini pointi kati ya aliye nafasi ya pili na nafasi ya sita ni mbili au tatu tu, jambo ambalo linaonyesha pia ligi ya nchi hiyo ilikuwa na ushindani wa juu kabisa.

Takwimu za uchezaji, zinaibeba sana Mo Bejaia licha ya ligi ya ushindani wa juu wa nyumbani kwao. Ukiangalia, ni nadra sana kucheza mechi mbili bila ya kushinda.

Takwimu zinasema imeweza kucheza mechi tatu bila ya kupoteza na ikacheza mechi tano mfululizo bila ya kupata sare, maana yake ni timu inayochipukia lakini hatari sana.

Yanga hawatatakiwa kuibeza kwa kuwa kufikia hatua hiyo moja ya timu ilizozitoa kwenye Kombe la Shirikisho ni Club African ambayo ndiyo timu yenye mashabiki wengi zaidi nchini Tunisia ikifuatiwa na Esperance halafu Etoile du Sahel.

Ukiachana na hivyo, ndani kuna wachezaji ambao iwe isiwe, Yanga inapaswa kuwa makini nao kwa kuwa rekodi zao kiufungaji katika mechi za nyumbani na hizo za kimataifa wamethibitisha ni watu hatari sana.

Mfano Mohammed Waliou Ndoye raia wa Senegal ambaye anavaa namba jezi 19, huyu ni mtu hatari. Katika mechi nne kafunga mabao matatu, hizi ni zile za Ligi Kuu Algeria lakini zile za kimataifa, mechi nne kafunga mabao mawili. Ninaamini Yanga wamejiandaa zaidi yake kwa kuwa ni mwepesi na hatari kwenye kupiga mashuti.

Bado wana kiungo Zahir Zerdab anayevaa namba 22 mwenye uraia wa Ufaransa pia Faouz Yahaya mwenye namba 10 mgongoni, ni watu hatari ambao rekodi za ufungaji za mabao mawili katika kila mechi nne zinawabeba.

Kitu kingine kizuri kwa Waarabu hao ni kwamba ina wigo mpana wa wafungaji. Niliowataja kama watashindwa kufunga bao kuna akina Soumaila Sidibe raia wa Mali, Ismail Belkacemi ambao wamekuwa mara kwa mara wanapatikana katika listi ya wafungaji.

Kingine wanachopaswa kukumbuka Yanga ni kwamba sehemu ya ulinzi, Mo Bejaia wanaonekana kuwa imara sana. Ni timu yenye mashambulizi machache lakini mazito, lakini haitaki kabisa kufungwa.

Lazima tumwamini Pluijm na wachezaji wa Yanga, lakini lazima tuwakumbushe kama namna hii. Tuwaamini wamejiandaa vizuri lakini umakini ndani ya dakika 90 unapaswa kuwa juu zaidi ya mechi zote walizocheza.

Ugenini kuna ugumu wake, lakini umakini wa juu au zaidi kama ule katika mechi dhidi ya Sagrada Esperanca ya Angola, unahitajika.

TAKWIMU ZA MO BEJAIA:

Cheza mechi bila kupoteza:                    1

Kucheza mechi bila kushinda:        1

Kucheza mechi bila kupoteza:         3

Sare za mfululizo katika mechi tano:      1

Kushinda mechi za nyumbani mfululizo: 1

Kucheza nyumbani bila kupoteza mfululizo:    8

Mechi za nyumbani mfululizo bila ya sare:      1

Mechi mfululizo za ugenini bila kushinda:   5

Kucheza ugenini mfululizo bila kupoteza:    2

Ushindi mkubwa     5-1

Kipigo kikubwa       0-2

Wastani wa mabao kwa mechi 2.05

HIVI NDIVYO KIUNGO WA MTIBWA SUGAR, ALIVYOTUA SIMBA AKIWA BILA RASTA

MOHAMMMED IBRAHIM AKISAINI SIMBA MBELE YA RAIS WA SIMBA, EVANS AVEVA
Kikosi cha Simba tayari kina viungo watano, lakini haijaridhika imeibomoa Mtibwa Sugar baada ya kumsajili kiungo wake mchezeshaji, Mohammed Ibrahim ‘Rasta’.

Timu hiyo, hadi hivi sasa imesajili wachezaji wanne akiwemo Rasta, Muzamir Yassin pia kutoka Mtibwa, Jamal Mnyate na Emmanuel Semwanza wote wa Mwadui FC.

RASTA WAKATI AKIWA MTIBWA

Licha ya kuwasajili nyota hao, Simba bado inaendelea kufanya mazungumzo ya usajili na wachezaji wengine akiwemo kiungo wa Mtibwa, Shiza Kichuya.

Kwa mujibu wa taarifa 'Rasta' amesaini mkataba wa miaka miwili jana mchana.

Moja ya makubaliano ya Rasta na Simba ni kulipwa Sh 250,000 kila Simba inaposhinda yeye akiwa kikosini lakini dau lake la usajili limefichwa kwa sababu maalum.

 “Tulikuwa hatutaki kuona masuala yetu ya usajili yanafanyika kwa uwazi, kwa sababu nusu ya wachezaji tunaowahitaji kwa ajili ya kuwasajili wana mikataba na timu zao.

“Ukiachana na Rasta wachezaji wengine ambao tumemalizana nao ni Yassin, Mnyate na Semwanza. Huyu Rasta kasaini leo (jana) mchana, amesaini mkataba wa miaka miwili kwa sharti la kulipwa Sh 250,000 kama posho yake kila timu inaposhinda,” alisema mmoja wa viongozi wa Kamati ya Usajili ya Simba. 

Alipotafutwa meneja wa mchezaji huyo, Jamal Kasongo kuzungumzia hilo, alikiri taarifa hizo kuwa za kweli Rasta amesaini mkataba wa miaka miwili Simba.

“Nikutoe hofu tu, Mohammed (Rasta) amesaini mkataba leo (jana) hii na hapa ninapoongea na wewe, ndiyo tunamalizana kwa maana ya kusaini mkataba huo wa miaka miwili,” alisema Kasongo.