Shabiki wa Man United: Fukuza Mourinho au niue mbwa wangu

Mtandao wa jana ulilipuka kwa post nzito baada ya Manchester United kupoteza mchezo mwingine tena chini ya utawala wa Jose Mourinho.
Mashetani Wekundu hao wamefungwa mabao 2-1 dhidi ya Fenerbahce kwenye Michuano ya Europa, na kuweka rehani mataumaini yao ya kufuzu hatua ya mtoano.
Na kufuatia kipigo hicho ambacho ni cha tano kwenye michuano yote msimu huu, baadhi ya mashabiki waliamua kumalizia hasira zao kwenye mitandao ya kijamii na kutaka Mourinho afukuzwe na arejeshwe Sir Alex Ferguson, ambaye alistaafu mwaka 2013.

Kevin Durant amwadhibu Ex wake, Westbrook apotea.

Kilichosubiriwa kimetimia na inawezekana kikawa. Kilichotegemewa pengine sicho kilichotimia, na kilifikiriwa inawezekana sicho kilichotokea. Wengi walisubiri kuona mchezo kati ya Oklahoma City Thunders dhidi ya Golden State Warriors hasa uhasama kati ya Kevin Durant dhidi ya Russell Westbrook.
Kevin Durant alihama kutoka klabu ya OKC na kuelekea Oakland katika klabu ya Warriors na ukawa ni uhamisho ambao ulizua maswali mengi ambayo wengi walihisi amekuwa mchezaji asiyejiamini na ambaye kama angehama hakutakiwa kujiunga na klabu yenye nyota wengine bali angeeenda kutengeneza ufalme wake mahali kwingine.
Alikwua ni Durant ambaye alikuwa na usiku mzuri zaidi kwani aliiongoza Warriors kupata ushindi mnono. Durant alipata mitupo 7 ya pointi 3 ambayo ndio mingi zaidi kuwahi kuipata katika mchezo mmoja na kumaliza mchezo na pointi 39. Warriors wakamaliza mchezo kwa kuichapa OKC na Russell Westbrook kwa pointi 122-96.
Westbrook alidhibitiwa na kufunga pointi  20 tu baada ya kuja katika mchezo huu akiwa mfungaji bora zaidi akiwa na wastani wa pointi 37.8 kwa mchezo.
Stephen Curry aliongeza pointi 21 points na assist 7, huku Klay Thompson ambaye amekuwa na msimu mbaya hasa kwenye ufungaji wake wa pointi 3 akifunga pointi 18, na kupata mitupo 4 ya pointi 3.
Victor Oladipo aliiongoza Oklahoma City akimaliza na pointi 21.
TAKWIMU
Kevin Durant amefunga pointi 20 au zaidi katika michezo 69 mfululizo akiungana na Michael Jordan ambaye alifanya hivyo kuanzia  Nov. 24, 1990, mpaka April 19, 1991.
Pointi 39 za Kevin Durant zimekuwa pointi nyingi zaidi kwa mchezaji kuifunga timu yake ya zamani akilinagana na Danny Ainge na Stephon Marbury  ambao waliwahi kufanya hivyo.

MAVUGO AAMUA KUFUNGUKA KUHUSIANA NA YEYE KUSHINDWA KUFUNGA

MAVUGO

Straika wa Simba, Laudit Mavugo, juzi alishindwa kutumia nafasi kadhaa alizozipata katika mchezo dhidi ya Stand United na kusema kuwa hakuwa na bahati katika mchezo huo.

Mavugo ambaye mpaka sasa ameifungia Simba mabao manne katika Ligi Kuu Bara, alisababisha penalti iliyozaa bao lililoipa ushindi timu yake lakini yeye akashindwa kuonyesha makali yake zaidi ya hapo.

“Mchezo ulikuwa mgumu lakini tunamshukuru Mungu kupata ushindi, nimekosa nafasi kadhaa za kufunga lakini najipanga kwa mechi zijazo na hasa mzunguko wa pili ambao naamini nitarejea katika ubora wangu ili niweze kuisaidia timu yangu kupata matokeo mazuri na kutwaa taji la Ligi Kuu Bara msimu huu,” alisema Mavugo.

Hata hivyo, bado Mavugo ana nafasi ya kufanya vema katika Ligi Kuu Bara kwa kujirekebisha katika mambo kadhaa.

Moja ya jambo analotakiwa kurekebisha ni upotezaji wa nafasi za mabao ambazo amekuwa akipoteza nyingi kutokana na kuwa na papara.

MWAMUZI WA MECHI YA YANGA DHIDI YA MBEYA CITY AMCHOSHA KABISA BOSSOU

Beki wa Yanga, Vincent Bossou, ametamka hadharani licha ya kukubali kipigo cha mabai 2-1 kutoka kwa Mbeya City lakini hatamsahau mwamuzi wa kati wa mchezo huo, Rajab Mrope kutokana na maamuzi yake kuwa tata.

Yanga ilipata kipigo hicho kwenye Uwanja wa Sokoine jijini Mbeya katika mchezo wa Ligi Kuu Bara, juzi, ambapo beki huyo raia wa Togo anasema hajawahi kuona maamuzi kadhaa yaliyofanywa na refa huyo.

“Tumefungwa na tunakubali matokeo lakini sitasahau alichokifanya refa, alikuwa na makosa mengi na maamuzi tata kibao ambayo yametugharimu kwa kiasi kikubwa.

“Sidhani kama marefa wa namna hii wataweza kulikomboa soka la Tanzania ambalo linataka kupiga hatua kutoka hapa lilipo kwa sababu hawajiamini na hata kuchezesha kwenyewe inakuwa shida na hata kusimamia maamuzi yao,” alisema Bossou.     

Katika mchezo huo, mwamuzi alikubali bao la pili la Mbeya City lakini baada ya kuzongwa na wachezaji wa Yanga waliodai haikuwa sahihi kwa kuwa faulo iliyopigwa ilitekelezwa bila ruhusa ya mwamuzi, refa huyo akaamuru faulo irudiwe, Mbeya City nao wakamzonga wakilalamika, akabadili maamuzi tena na kukubali kuwa ni bao na mpira uwekwe kati.

STRAIKA BILBAO APIGA BAO TANO PEKE YAKE TIMU YAKE IKIIMALIZA GENK YA SAMATTA MABAO 5-3

Mshambuliaji hatari wa Athletic Bilbao, Aritz Aduriz ameonyesha umri si jambo baya katika soka na una faida baada ya kufunga mabao yote matano wakati timu yake ilipoimaliza KRC Genk ya Ubelgiji kwa mabao 5-3.

Ilikuwa ni mechi ya Kombe la Europa na Mtanzania Mbwana Samatta alikuwa uwanjani hadi Aduriz alipofunga bao lake la 4 katika dakika ya 74 na akatika katika dakika ya 83.

Mechi ilikuwa ngumu kwa kila upande Aduriz  mwenye umri wa miaka 35 alipotupia bao katika dakika ya 8 na kuongeza tena katika dakika ya 24 lakini Genk wakajibu kwa kupata bao kupitia Leon Balley raia wa Jamaica.

Wakati ikionekana kuwa mapumziko itakuwa 2-1, Aduriz alipachika tena bao katika dakika ya 44 na kufanya hadi mapumziko iwe wenyeji wako mbele kwa mabao 3-1.

Kipindi cha pili, Genk walionekana wamepania baada ya kupata bao kupitia kiungo wake Onyinye Ndidi na Aduriz akaongeza bao la nne katika dakika ya 74 na kuwavunja nguvu Genk.

Samatta akitoka katika dakika ya 83 na kumuachia Nikos Karelis kumalizia dakika saba zilizobaki lakini Aduriz akashindilia msumari wa mwisho katika dakika ya 90.