GENK YA SAMATTA YAZIDIWA UJANJA NA CELTA VIGO, YACHAPWA 3-2 EUROPA LEAGUE

Celta Vigo ya Hispania imeanza vizuri hatua ya robo fainali ya Europa League kwa kuichapa KRC Genk ya Ubelgiji kwa mabao 3-2.

Mtanzania Mbwana Samatta alikuwa katika kikosi cha Genk na kuonyesha uwezo wa juu, lakini hakuweza kuisaidia kuimaliza Celta Vigo inayoshiriki La Liga.

Hata hivyo, Genk walicheza vizuri na kuonyesha wana uwezo wa kubadili matokeo katika mechi ya marudiano.

Genk ndiyo walitangulia kufunga bao kupitia kwa Jean Paul Boetius katika dakika ya 10 tu.

Wenyeji Celta Vigo wakacharuka na kupata bao katika dakika ya 15 kupitia Pione Sisto na mshambuliaji wao hatari, Iago Aspas akafunga la pili dakika ya 18.

John Guidetti akaongeza la tatu katika dakika ya 38 na Celta ikaenda mapumziko ikiongoza kwa mabao 3-1.

Katika kipindi cha pili, Genk walikianza kasi na kufanikiwa kupata bao la dakika ya 67 na kuzidi kuufanya mchezo uwe mgumu zaidi.

ANGALIA HII MIOYO YA MASHABIKI WA DORTMUND, HALAFU ANGALIA USHABIKI WA KIJINGA WA YANGA NA SIMBA

USHABIKI wa michezo ni furaha, ukiuendekeza mara nyingi unavuka mipaka kutoka katika furaha na mwisho unakuharibia mambo mengi sana ya muhimu.

Ushabiki wa michezo na hasa soka, umewagombanisha wengi na rafiki na ndugu zao. Umewajengea wengi uadui na wengine, umeanzisha misigano na kutoelewana kwa wengi.

Wapo waliopoteza kazi zao au hata kuingia katika migogoro kwa majirani au familia zao lakini yote yanatokana na migogoro inayotokana na ushabiki wa kupindukia.

Hakika ushabiki haupaswi kuwa wa kupindukia na kufikia kujenga uadui au makundi yanayoeneza chuki na kupoteza kabisa maana ya ushabiki wenyewe.

Labda nikukumbushe Rwanda baada ya kupita katika mauaji ya kimbari mwaka 1994 waliutumia mchezo wa mpira kuwakutanisha wananchi wake, safari hii wakijulikana kama Wanyarwanda na kwa pamoja wakafuta yale mambo ya makabila matatu, Watutsi, Wahutu na Watwa.

Unakuta Mtutsi na Mhutu kwa pamoja wanashabikia APR na Mtusi, Mtwa na Mhutu wanashangilia Rayon. Kwa pamoja wanaungana na taratibu wakaanza kusahau machungu na kuondoa visasi, watu wakasameheana na kuanza kuishi maisha mapya.

Nchi nyingi zimetumia njia hiyo kuhakikisha zinarejea katika mstari sahihi kwa kuwa furaha ya michezo inayojenga ushabiki inaweza kuwa furaha na faida badala ya hasara.

Juzi, mashabiki wa Borussia Dortmund ya Ujerumani walifanya kitu kingine kinachoweza kukumbukwa kwa muda mrefu hasa tunapozungumzia faida ya ushabiki.

Mechi ya Ligi ya Mabingwa Ulaya kati ya Dortmund na AS Monaco ya Ufaransa ilitarajiwa kuchezwa Jumanne mjini Dortmund, Ujerumani. Lakini wakati basi la wachezaji wa wenyeji likiwa njiani, lilishambuliwa na milipuko mitatu, hivyo kusababisha mechi kusogezwa mbele.

Hatua hiyo ilivuruga ratiba ya mashabiki wa AS Monaco ambao walijua wangeondoka usiku baada ya mechi na wengine alfajiri kurejea Ufaransa. Lakini sasa walilazimika kusubiri hadi Jumatano kwa kuwa mechi ilisogezwa ili waondoke Alhamisi. Gharama ikaongezeka kwao na bajeti ikavurugika.

Iliwezekana wangeanza kurejea Jumatano bila kuona mechi kwa kuwa hawakuwa na ujanja. Lakini mashabiki wa Dortmund walitaka wenzao waone mechi yao na walichofanya ni kuzungumza, wakajiunganisha na kuanza kuwaalika.

Karibu kila familia yenye mashabiki wa Dortmund ilialika mashabiki kadhaa wa Monaco ambao bajeti yao ilikuwa imevurugika, wakala nao, wakanywa nao na hata wengine wakalala katika majumba yao.

Juzi Jumatano, mechi ikachezwa na wenyeji wakalala kwa mabao 3-2. Wana deni watakapokwenda Monaco, Ufaransa kuhakikisha wanawashinda wenyeji wao ili wasonge mbele. Lakini mashabiki wao wanaingia kwenye rekodi ya kuwa moja ya mashabiki wa aina yake.

Mashabiki wa Dortmund wameonyesha ushabiki ni zaidi ya furaha kwa timu, badala yake ndani yake kunaweza kuwa na urafiki, undugu na kuthamini au kujali furaha ya mwingine.

Vipi wewe shabiki wa Simba, unampiga yule wa Yanga  bila kosa kwa kuwa tu amevaa nguo za njano kwenye jukwaa la upande wa Simba? Ukimuelekeza na kumueleza si sehemu sahihi kwake, tatizo ni nini?

Ukiingia uwanjani wewe shabiki wa Yanga, ukashangilia kwa juhudi na kufurahi na wenzako bila kumtukana matusi ya nguoni yule wa Simba, hasara yako ni ipi?

Mashabiki wengi hasa wa soka hapa nchini wanataka kuonyesha mchezo wa soka si wa kiungwana, ni mchezo wa kibabe, mchezo wa wahuni au watu wasio na mpangilio. Jambo ambalo si kweli hata kidogo, badala yake ni nguvu ya wapuuzi wachache wenye nguvu inayowapa ruhusa kuonyesha upuuzi wao mbele ya wengine.

Unaweza kufurahia au kusherehekea bila kuumiza wengine, bila kuwabugudhi au kuwadhalilisha. Somo la mashabiki wa Dortmund, linatoa funzo kwa mashabiki wengi wa soka duniani lakini wale wa Yanga na Simba, hili ni lenu na ndio mnahusika hasa, jifunzeni.

RONALDO ASEMA MABAO 100 ULAYA SI MCHEZO, HAKUTEGEMEA

Mshambuliaji nyota wa Real Madrid, Cristiano Ronaldo amesema mabao 100 aliyofunga Ulaya ni jambo ambalo hakulitegemea.

Ronaldo raia wa Ureno, ameweke rekodi kwa kufikisha mabao 100 aliyofunga barani Ulaya.

“Si  jambo dogo, si jambo rahisi. Sikuwahi kutarajia hili kwamba siku moja nitafikisha mabao 100,” alisema.

Ronaldo alisema ameshangazwa pia kusikia kwamba kuna ambao walikuwa na hofu kuhusiana na uwezo wake wa kufunga mabao kwa kuwa umri wake sasa ni zaidi ya miaka 30.

STAA CHIRWA AWAZIMIA SIMU VIGOGO WA YANGA, WAHAHA KUMPATA

 

Pamoja na juhudi za vigogo wa Klabu ya Yanga kumshawishi mshambuliaji wao, Obrey Chirwa raia wa Zambia kuungana na wenzake kuelekea nchini Algeria kuwavaa MC Alger ya nchini humo, taarifa kutoka ndani ya viongozi hao ni kuwa mshambuliaji huyo hakupatikana hewani baada ya kufunga simu zake zote.

Chirwa aliyejiunga na Yanga mwanzoni mwa msimu huu akitokea FC Platinum ya Zimbambwe, aligoma kuungana na wenzake kwa ajili ya safari hiyo kwenye mchezo wa marudiano wa Kombe la Shirikisho Afrika dhidi ya MC Alger kwa kile kinachodaiwa kutokulipwa kwa mishahara yake ya miezi mitatu.

Habari za uhakika ni kuwa baada ya Chirwa kugoma ndipo jina lake likaondolewa katika orodha ya waliotakiwa kusafiri kwenda Algeria, jana jioni.

“Jana (juzi) kuna vigogo wa Yanga ambao sitapenda kuwataja majina yao walikuwa wakimtafuta Chirwa ili kumshawishi aungane na wenzake katika safari lakini simu zake zote za mkononi zilikuwa hazipatikani,” kilisema chanzo na kuendelea:

“Kuna waziri alinipigia simu akiniulizia ishu hiyo nikamueleza mimi ninavyojua, hivyo akaniomba nimtafute Chirwa ili aweze kuzungumza naye ikiwezekana aungane na wenzake ila imeshindikana maana nilimpigia Chirwa sikumpata, nilipoenda nyumbani anapoishi sikumkuta.”

Alipotafutwa Katibu Mkuu wa Yanga, Charles Mkwasa, alisema: “Chirwa hajaungana na wenzake kwa kuwa ana matatizo yake ya kifamilia.” 

MKEMI ASEMA BADALA YA SERENGETI KUWA "GABON HADI KOMBE LA DUNIA", ITAGEUKA NA KUWA "GABON HADI NYUMBANI TANZANIA"!!

MKEMI AKIZUNGUMZA NA WAANDISHI WA HABARI, LEO.

Uongozi wa Yanga umesema hautaenda mahakamani kupinga Simba kupewa pointi tatu.

Simba imeshinda rufaa yake dhidi ya Kagera Sugar na kupata pointi tatu na mabao matatu ikiwa ni baada ya kubainika beki Mohamed Fakhi alicheza mechi dhidi ya Simba akiwa na kadi tatu za njano.

Mjumbe wa Kamati ya Utendaji ya Yanga, Salum Mkemi amesema kama kuna wanachama wanataka kwenda mahakamani, wao hawatakuwa na uwezo wa kuwazuia huku akisisitiza Tanzania ikifungiwa, Serengeti Boys itang’olewa kushiriki michuano ya Kombe la Mataifa Afrika na ile kauli mbio ya Gabon mpaka Kombe la Dunia itageuka na kuwa “Gabon hadi Nyumbani Tanzania”.

“Wakiendelea hivi itakuwa ni Gabon hadi Nyumbani, haitakuwa Kombe la Dunia tena.

”Watu wana hasira zao, sisi viongozi tunaweza tusijue kinachoendelea. Kagera ni timu ndogo, wanaonewa, hawatendewi haki. Sasa sisi tumeinunua hii kesi.

“Ajabu kabisa, waamuzi wameitwa wawili tu na wengine hawakuitwa. Hii si sawa, kuna jambo hapa,” alihoji Mkem

MASHABIKI SITA WA LEICESTER, KILA MMOJA AFUNGWA MIEZI MINNE NCHINI HISPANIA, NI ZILE FUJO DHIDI YA POLISI

Mashabiki sita wa Leicester City ya England, kila mmoja amefungwa jela miezi minne nchini Hispania.

Mashabiki hao wamepatikana na hatia ya kupigana na polisi katika mii wa Madrid, saw kadhaa kabla ya timu yao kuivaa Atletico Madrid katika mechi ya robo fainali ya Ligi ya Mabingwa Ulaya.

Mashabiki wa Uingereza wamekuwa na rekodi ya ufanyaji vurugu wanapokwenda kuzishangilia timu zao katika nchi mbalimbali barani Ulaya.

Kamati ya saa 72 imeipa Simba pointi 3 na magoli matatu, Simba imefikisha pointi 61

Kamati ya Usimamizi na Uendeshaji wa Ligi Tanzania, maarufu kama Kamati ya Saa 72 imeipa Simba SC pointi tatu na mabao matatu kutokana na rufaa waliyoikatia Kagera Sugar kwa kumtumia beki Mohammed Fakhi akiwa ana kadi tatu za njano katika mechi baina ya timu hizo Aprili 2, mwaka huu.
Katika mchezo huo ambao Kagera Sugar walishinda mabao 2-1 Uwanja wa Kaitaba, wanadaiwa kukiuka kanuni kwa kumchezesha Fakhi, beki wa zamani wa Simba badala ya mchezaji huyo kutumikia adhabu ya kadi tatu za njano alizopata mfululizo.
Mwenyekiti wa Bodi ya Ligi, Ahmed Yahya amewaambia Waandishi wa Habari usiku wa April 13, 2017 kwamba Kamati ilibaini ni kweli Kagera Sugar walifanya kosa hilo la kikanuni na adhabu yake ni kupokonywa ushindi.
Kwa ushindi huo, Simba sasa inafikisha pointi 61 baada ya kucheza mechi 26, wakiendelea kuongoza Ligi Kuu Tanzania bara mbele ya mabingwa watetezi, Yanga wenye pointi 56 wakiwa wamecheza mechi 25.
Ikumbukwe Simba iliwasilisha malalamiko ikitaka ipewe ushindi wa pointi tatu na mabao matatu kutokana na Kagera Sugar kumchezesha Fakhi akiwa na kadi tatu za njano katika mechi yao namba 194 iliyofanyika Aprili 2, 2017 Uwanja wa Kaitaba mjini Bukoba.
Katika kikao chake awali Ijumaa iliyopita, Kamati baada ya kupitia malalamiko hayo, iliahirisha shauri hilo hadi leo (April 13, 2017) kujipa muda wa kufuatilia baadhi ya vielelezo kuhusu malalamiko hayo.
“Malalamiko yaliletwa kwetu na timu ya Simba baada ya kufungwa na Kagera Sugar 2-1 kwenye uwanja wa Kaitaba, Simba walileta malalamiko kwamba kuna mchezaji mmoja wa Kagera Sugar Mohamed Fakhi alicheza mchezo huo wakati akiwa na kadi tatu za njano jambo ambalo ni kinyume na taratibu zetu kwa mujibu wa kanuni zetu za ligi,” alisema mwenyekiti wa kamati ya saa 72 wakati akitangaza uamuzi uliofikiwa na kamati yake.
“Tulikaa kikao cha kwanza siku ya tarehe 7 April, 2017 tukajadili, bahati mbaya siku hiyo hatukufanikiwa kufikia mwisho kwa sababu tulikuwa tunakosa baadhi ya taarifa ambazo zinaendana na maamuzi ambayo tungeweza kuyafanya kwa hiyo tulijipa muda hadi leo na tumefanikiwa kuzipata taarifa ambazo tulikuwa tunazitafuta na jioni hii tumefikia maamuzi.”
“Kutokana na nyaraka tulizonazo imethibitika kwamba, mchezaji huyu ambaye anaitwa Mohamed Fakhi alipata kadi ya njano kwenye mchezo kati ya Kagera Sugar na Mbeya City, akapata kadi nyingine ya njano kwenye mchezo kati ya Kagera Sugar na Majimaji na pia akapata kadi ya njano kwenye mchezo kati Kagera Sugar na African Lyon.”
“Baada ya kupata malalamiko haya, watu wa Kagera Sugar walikuja juu na kusema kwamba, mchezaji wao alipewa kadi kwenye mchezo kati ya Kagera Sugar na African Lyon na huo ndio utata uliotufanya tutafute ushahidi kuona kwamba hicho kitu kilitokea. Tumepata taarifa na kamati imeridhia kwamba hiki kitu kilitokea na kutokana na hilo, mchezaji huyo alikuwa nje ya sheria 37 (14) na adhabu yake ipo kwenye sheria yetu ambayo inasema kwamba (timu itakayotumia mchezaji ambaye ana kadi tatu za njano, basi itabatilishiwa matokeo na kunyang’anywa ushindi. Timu pinzani itapewa ushindi wa pointi  na magoli matatu).”
Kwa hali hiyo, naomba nitangaze rasmi kwamba, kamati imefikia maamuzi hayo na taratibu zingine zitafuata kuhusiana na hilo.
Tumechukua muda mrefu kutoa maamuzi kwa sababu ya hali ilivyokuwa, kwamba upande wa pili walikuwa wanasema rekodi zao hazioneshi hivyo kwa hiyo ilibidi tutafute rekodi za ziada ndiyo maana tumechukua muda mrefu kutoa maamuzi ya suala hili. Vinginevyo tungetoa maamuzi siku ya tarehe 7 tulipopata malalamiko haya.

UWANJA WA CCM KURUMBA WAPEWA HADHI YA KIMATAIFA

Uwanja wa CCM Kirumba wa mkoani Mwanza umeidhinishwa na CAF pamoja na FIFA kutumika kwa mechi za kimataifa baada ya kukidhi vigezo na viwango vya kimataifa.
Rais wa TFF Jamal Malinzi ametweet kuwapongeza wakazi wa jiji la Mwanza baada ya maofisa wa CAF na FIFA kuupitisha uwanja huo baada ya kumalizika kwa ukaguzi.

Yanga walikwama kuutumia uwanja huo kwa mechi yao ya kombe la shirikisho dhidi ya MC Alger kutokana na uwanja huo kutokidhi baadhi ya vigezo.
Kabla ya mechi hiyo, Yanga walituma maombi CAF wakitaka kubadili uwanja kutoka uwanja wa taifa kwenda CCM Kirumba lakini baada ya uwanja huo kukaguliwa afisa wa CAFalibaini kasoro kadhaa ambazo aliagiza zifanyiwe kazi kabla ya kuanza kutumiwa kwa mechi za kimataifa.
Baada ya marekebisho na ukarabati uliofanywa, sasa uwanja huo utatumika kwa mechi za kimataifa hivyo wakazi wa Mwanza huenda wakaanza kushuhudia michezo ya kimataifa kwa ngazi ya vilabu pamoja na ile ya timu za taifa.