TULITUMIA STYLE YA KIITALIA: KOCHA AFRICAN LYON

Na Ram Mbegeze

Kocha mkuu wa African Lyon Bernardo Tavares amesema waliamua kutumia style ya Italia kuimaliza Simba kwenye mchezo wa jana Jumapili na kufanikiwa kuondoka na pointi tatu mbele ya Simba ambao kabla ya mchezo huo walikuwa hawajapoteza mechi katika michezo yao 13 tangu kuanza kwa msimu huu.

Tavares hakuacha kuipongeza Simba akisema wanatimu nzuri na wachezaji wazuri ndio maana waliweza kushinda mechi 11 na kutoka sare katika mechi mbili kati ya 13 zilizopita.
“Kwanza nianze kwa kuipongeza Simba kwasababu ni timu nzuri, kabla ya mchezo wetu walikuwa hawajapoteza mcezo hata mmoja, walishinda mechi 11 na sare mbili hakukuwa na timu iliyoifunga Simba, kwahiyo ni timu nzuri yenye wachezaji wazuri.”
“Kipindi cha kwanza tulipata nafasi tatu za kufunga, mbili zikagonga ‘mtambaa panya’ wapinzani wetu pia walipata nafasi.”
“Kipindi cha pili walirudi wakiwa na mbinu ya kutumia nguvu na kutushambulia lakini tuliweza kuwadhibiti kutokana na aina ya ulinzi wa Italia tuliouweka. “
“Mbinu kwa ajili ya mchezo huu ziliwapa nafasi mabeki wangu kucheza vizuri licha ya kuwa Simba walipata nafasi japo wengine wanaweza kusema Simba walipata nafasi lakini hii ndio soka. Wakati mwingine unakuwa na bahati wakati mwingine hupati bahati, sisi tulikuwa na bahati.”

MAYANJA: HATUZIANGALII AZAM FC NA YANGA

Na Ram Mbegeze
Baada ya kupoteza mchezo wao wa kwanza, kocha msaidizi wa Simba Jackson Mayanja amesema wao hawaziangalii Yanga na Azam badala yake wanaangalia mwelekeo wao na mechi zao zijazo ambapo ameendelea kusisitiza kwao kila mechi ni fainali.

Mayanja alikuwa akijibu swali aliloulizwa kuhusu mwelekeo wa timu yao baada ya kupoteza mechi huku wapinzani wao wakipata ushindi dhidi ya Tanzania Prisons na kupunguza pengo la pointi kutoka nane na kubaki pointi tano.
“Sisi hatuangalii Yanga wala Azam, tunaangalia mechi za Simba na kila mechi tunacheza kama fainali lakini kama matokeo yanakuja kama hivi ni bahati mbaya,” alisema Mayanja ambaye pia aliipongeza African Lyon kwa kupata matokeo ya ushindi.
Mayanja amesema walijaribu kufanya kila kitu ikiwa ni pamoja na kubadili mfumo kwa ajili ya kutafuta ushindi lakini mambo yalikuwa magumu kwao kutokana na African Lyon kujaza mabeki katika eneo lao la ulinzi.
“Lyon walipaki basi, tulifanya kila kitu kubadilisha mfumo kwenda mbele kwa kuweka washambuliaji wanne lakini hatukufanikiwa. Siku haikuwa yetu wachezaji ni walewale ambao huwa tunawatumia kila siku na tunapata matokeo lakini haya ndio matokeo ya mpira.”

MAN UTD WAPATA PIGO,KUMKOSA IBRA KADABRA DHIDI YA ARSENAL NOV 19

Na Ram Mbegeze
Zlatan Ibrahimovic ataukosa mchezo ujao wa Ligi ya England kati ya Manchester United na Arsenal

Straika huyo jana alipata kadi ya tano kwenye ligi katika mchezo ambao United ilishinda 3-1 dhidi ya Swansea, hivyo kutoruhusiwa kucheza mchezo dhidi ya Arsenal utakaofanyika Novemba 19.
Ibrahimovic, 35, jana alimaliza ukame wa mabao kwake na kwa timu yake baada ya kufunga mabao mawili katika ushindi wa mabao 3-1.
Msweden huyo alipata kadi hiyo ya njano baada ya kumfanyia faulo ya kizembe Leroy Fer mnamo dakika ya 76 ya mchezo.
Zlatan ndiye kinara wa uchezaji faulo kwenye Premier League mpaka sasa akiwa amecheza faulo mara 26, kitu ambacho ni mara chache sana kutokea kwa straika.
“Nilidhani ukiwa kwenye Ligi ya England unacheza rafu tu, hicho ndicho nilichokuwa nikisikia kabla ya kuja hapa,” aliwatania wanahabari. “Kila mara ninapocheza rafu basi nimekuwa nikipewa kadi ya njano.”
Kutokuwepo kwa Zlatan kutapelekea Mourinho kufanya mabadiliko na kumchezesha Marcus Rashford kwenye nafasi hiyo ya ushambuliaji wa kati.

MOURINHO:KUNA BAADHI YA WACHEZAJI WA MAN UTD WANA MATAIZO SANA

Na Ram Mbegeze
Meneja wa Manchester United Jose Mourinho ametilia shaka juu ya ari ya kupambana kwa baadhi ya wachezaji wake, licha ya timu yake kuibuka na ushindi mnono wa mabao 3-1 dhidi ya Swansea City. jana.

Mourinho alilazimika kutumia mabeki wasio wa asili kwenye mchezo huo, ambapo wachezaji wawili asilia kwenye nafasi hizo Chris Smalling and Luke Shaw waliondolewa kabla ya mchezo, wakati Daley Blind pekee ndiye beki aliyepata nafasi ya kubaki kwenye benchi.
Ashley Young, Phil Jones, Marcos Rojo na Matteo Darmian ndiyo waliongoza ukuta wa United, huku Mourinho akitoa kauli kuhusu wachezaji ambao walionekana kutokuwa fiti katika mchezo huo.
“Nina rafiki yangu ambaye ni mchezaji mkubwa sana wa tennis na huwa ananiambia wakati ambao hucheza akiwa na maumivu na wakati ambao kucheza bila maumivu.
“Ili kushindana ni lazima upambane mpaka ukomo wako. Hii ni tabia kwa baadhi ya watu, na huo si utamaduni wangu.Ni zaidi ya utamaduni wangu, ni utamaduni wa Manchester United.
“Tuna wachezaji wenye matatizo sana. Kwenye kila mchezo, na najua kwasababu nina marafiki wengi kwenye michezo tofauti na wanachezaji kwenye kiwango cha juu sana, na unajua mara ngapi wanacheza wakiwa hawapo fiti kwa asilimia 100!!”
United wanashika nafasi ya sita katika msimamo wa Premier League baada ya kucheza michezo 11, pointi nane nyuma ya vinara wa ligi hiyo Liverpool.

LWANDAMINA RASMI AACHIA NGAZI ZESCO, ANATUA RASMI YANGA KESHO

Na Ram mbegeze

Hatimaye Kocha George Lwandamina amemalizana na klabu ya Zesco ambayo ameipa mafanikio makubwa.

Lwandamina ameachia ngazi rasmi kuinoa Zesco ambayo mkataba wake ulikuwa unaisha Januari 2017.
Akizungumza kutoka Zambia, Lwandamina amethibitisha kuachia ngazi katika klabu hiyo.
"Ni kweli, tumemalizana vizuri kabisa na mambo yamekwenda kitaalamu," alisema.
Kuhusiana na kutua Yanga, Lwandamina amekubali kuwa anakuja nchini lakini hakutana kuweka wazi.
"Baada ya hapa Zesco, sasa naelekea katika nchi nyingine ya Afrika. Nipe siku moja nikupe jibu," alisema.
Lakini taarifa za uhakika zinaeleza kwamba kocha huyo atafika nchini kesho usiku kwa ajili ya kumalizana na Yanga.
"Tunajua anakuja huko Tanzania kesho usiku, ndege yake inaonyesha hivyo," alisema wakala wake.

Tazama msimamo wa ligi kuu bara ulivyo kwa sasa Msimamo wa Ligi Kuu Msimu Huu

Rn	Timu	P	W	D	L	F	A	Gd	Pts
1	SIMBA SC	14	11	2	1	25	4	21	35
2	YANGA	14	9	3	2	29	7	22	30
3	KAGERA SUGAR	15	7	3	5	16	16	0	24
4	Azam FC	14	6	4	4	19	13	6	22
5	STAND UNITED	15	5	7	3	15	12	3	22
6	MTIBWA SUGAR	14	5	5	4	18	18	0	20
7	MBEYA CITY	14	5	4	5	13	14	-1	19
8	Ruvu Shooting	14	4	7	3	13	15	-2	19
9	NDANDA FC	15	5	4	6	13	16	-3	19
10	African Lyon	15	4	5	6	10	15	-5	17
11	T. PRISONS	14	3	7	4	7	9	-2	16
12	Mbao FC	15	4	3	8	15	20	-5	15
13	MWADUI FC	13	3	4	6	11	16	-5	13
14	JKT RUVU	15	2	7	6	6	12	-6	13
15	MAJIMAJI FC	14	4	1	9	11	23	-12	13
16	TOTO AFRICANS	15	3	3	9	9	17	-8	12

PICHA 7: Yanga ilivyoondoka na pointi 3 jijini Mbeya

Yanga SC wamejitutumua na kufuta makosa yao dhidi ya Prison ya Mbeya na kufanikiwa kuibuka na ushindi mwembamba wa bao pakee la penati katika mchezo uliochezwa Uwanja wa Sokoine jijini Mbeya.
Katika mchezo huo ambao ulikuwa mkali na wa kusisimua, kila timu ilianza kucheza kwa tahadhari kubwa ili kutoruhusu bao la mapema na kujiweka katika mazingira magumu.

Dakika ya 32, Mbuyu Twite alilimwa kadi ya njano baada ya kumfanyia faulo Benjamin Asukile.
Dakika ya 45 kinda wa Yanga Yusufu Mhilu alikosa bao baada ya shuti lake kupaa nje ya lango la Prisons.

Kipindi cha kwanza kiliisha huku kila upande ukitoka bila kuona lango la mpinzani wake.
Kipindi cha pili kilianza kwa kasi kutokana na Prisons kuamua kushambulia hali iliyopelekea mchezo kuwa mgumu kwa pande zote mbili.

Kutokana na hali kuzidi kuwa ngumu Yanga walifanya mabadiliko kwa kumtoa Yusufu Mhilu na nafasi yake kuchukuliwa na Simon Msuva.
Prisons walipata penati baada ya Deus Kaseke kufanya madhambi katika eneo la hatari, lakini penati iliyopigwa na Lambert Sabianka iliokolewa na Beno Kakolanya.

Dakika ya 60 Amissi Tambwe aliingia kuchukua nafasi ya Deus Kaseke.
Yanga walipata penati kufuatia mshambuliaji wao Mzambia Obrey Chirwa kuangushwa kwenye eneo la penati na Simon Msuva kuukwamisha mpira wavuni na kuipa Yanga bao la ushindi.
Mwamuzi alikataa kutoa penati kwa Yanga baada ya Donald Ngoma kufanyiwa faulo ya wazi na beki wa Prison dakika za majeruhi.

Mpaka filimbi ya mwisho inapulizwa, Yanga waliibuka kifua mbele kwa ushindi wa bao 1-0. Matokeo hayo yanaifanya Yanga kuendelea kuwa mbabe wa Prisons baada ya kuibuka na ushindi katika michezo mingi waliyokutana hivi karibuni.