Kakolanya amevunja ukimya kuhusu kusugua benchi Yanga

Na Zainabu Rajabu
LICHA ya kukosa nafasi ya uhakika ndani ya kikosi cha Yanga, mlinda mlango Beno Kakolanya amesema ataendelea kukomaa akiamini kwamba ipo siku atapata nafasi kama wenzake.
Kakolanya aliyejiunga na Yanga msimu huu akitokea Tanzania Prisons, amekuwa akipakta nafasi kwa nadra huku Deogratius Munishi ‘Dida’ na Ally Mustafa ‘Barthez’ wakicheza mara kwa mara.
Shaffihdauda.co.tz. ilizungumza na golikipa Beno Kakolanya ambaye amesema: “Nimekuwa nikicheza na kupata changamoto kwani kila kipa anaekuja wanasema hawezi pata namba lakini kwangu mimi nimepewa zaidi ya mechi nne na nimeonesha kiwango kizuri ila kupata nafasi katika kikosi cha kwanza ni maamuzi ya mwalimu.
“Siwezi kuporomoka kiwango changu kwani najiamini naweza kutokana na juhudi zangu ndiyo maana Yanga wakanisajili ila naamini Mungu yupo wakinipa nafasi tena nitaitumia vizuri,” amesema Kakolanya.
Aidha, Kakolanya amesema yaliyotokea jana ni mchezo wa mpira huku akimalizia na kusema bahati haikuwa yao kutinga fainali.
“Tumeshambulia sana ili kutafuta bao la kusawazisha lakini uimara wa kikosi cha Mbao ulionekana kuimarika vizuri nakuondoa mipira yote ya hatari langoni mwao.”
Yanga ambao walikuwa mabingwa watetezi wa kombe hilo la Azam Sport Federation (FA) jana wameambulia kichapo cha bao 1-0 kutoka kwa Mbao FC.